Oktyabrın 24-də, səhər saat 9-da Azərbaycanda 22 illik fasiləsiz həbsdən sonra 45 yaşlı “qanuni oğru”, kriminal dünyasının yeni “birinci adamı” adlandırılan Nadir Səlifov azadlığa çıxdı.

“Qafqazinfo”nun məlumatına görə, bu barədə “Praym Kraym” informasiya agentliyi yazıb.

Agentlik qeyd edir ki, “Lotu Quli”nin tezliklə azad olunacağı ilə bağlı aramsız dedi-qodular bu ilin avqustundan yayılıb. Oktyabrın başlanğıcından etibarən isə bu an hər gün gözlənilirdi.

Müşayiətçilər nəzərə alınmazsa, N. Səlifovu anası, həyat yoldaşı və iki uşağı qarşılayıb. 

Kriminal avtoritet azadlığa çıxandan sonra ilk olaraq atasının və ən yaxın şəriki, avtoritet Elşən Məmmədovun qəbirinə baş çəkib.

Gürcüstan vətəndaşı olan avtoritet Azərbaycanı tərk edib. O, gələcəkdə oğruların mərkəzi ola biləcək İstanbula köçməyi planlaşdırır.

“Lotu Quli”nin azadlığa çıxması ilə oğru dünyasında müxtəlif səbəblərdən həyata keçirilməyən dəyişikliklər gözlənilir. O, həbsxanada olmağına baxmayaraq, paradoksal olaraq kriminal aləmdə gedən proseslərə İspaniyada həbsdə olan “Şakro”dan (Kalaşov Zaxariy Knyazeviç) fərqli olaraq daha çox nəzarət edib. Bundan əlavə, “Quli” də “Şakro” kimi “oğru klanlarının münaqişəsi” kimi tanınan Oniani ilə Usoyanın davalarına müdaxilə etmədi, bitərəf qaldı.

Hər necə olsa da, bu gün “bütün ailələrin başçıları” “Lotu Quli” ilə dostluğa çalışırlar. İstənilən halda, Rövşən Lənkəranskinin və “Ded Xasan”ın (Aslan Usoyan) faciəli şəkildə həlak olmalarından sonra heç kim post-sovet kriminal aləminin yeni lideri ilə düşmənçilik etmək istəmir.

“Lotu Quli” ilə “partizan müharibəsi” vəziyyətində olan yeganə şəxs “Masallinski”dir (Rafiq Zeynalov). Ancaq bu qarşıdurmanın oğru dünyası ilə heç bir əlaqəsi yoxdur.