“Futbolçularıma təşəkkür edirəm. Qalib gəlməsək də, bunun üçün bütün gücümüzü ortaya qoyduq”.

“Qafqazinfo” xəbər verir ki, bu sözləri milli komandamızın baş məşqçisi Qurban Qurbanov deyib.

Yığma komandamız UEFA Millətlər Liqasının D Divizionunun III qrupunda doğma meydanda Malta ilə qarşılaşıb.

Oyundan sonra baş tutan mətbuat konfransında iştirak edən təcrübəli mütəxəssis matç barədə fikirlərini bildirib:

“Xeyli sayda qol epizodlardan istifadə edə bilmədik. Bu da normaldı. Məğlub olsaydıq, futbolçularımdan razı qalacaqdım. Çünki çox döyüşdük”.

- Qələbə qazanmaq üçün nə çatmadı?

- Gördüyünüz kimi, qol vura bilmədik. Futbolçularda gərginlik var idi. Deməzdim ki, bacarıqları yoxdu. Hər epizodda düzgün oynayırdılar. Buna görə onlara etiraz etmədim. Sadəcə, qol çatmadı.

- Azərbaycanlı futbolçular tez-tez oyun keçirməyə hazır deyil. Farer adlarından uzun yol gəldiyimizi nəzərə alsaq, start heyətdə dəyişiklik etmək düzgün olmazdımı?

- Əslində, heyətdə dəyişiklik etmək istəyirdim. Fikrim Təmkin Xəlilzadəni start heyətdə meydana buraxmaq idi. Sadəcə, Təmkin iki gün öncə xəstələnmişdi. Futbolçuların fiziki durumundan razı qaldım. Oyun sürətli getdi, dayanmadıq. Futbolçuların çoxu bu rejimə uyğunlaşırlar. Uyğunlaşa bilməyən futbolçular da bunu dərk etməlidirlər.

- Futbolçuların bəziləri oyunun sonlarında çox yorulmuşdular. Nəyə görə üçüncü dəyişikliyə əl atmadınız?

-  Farer adaları ilə oyundan sonra bərpa keçməyimiz vacib idi. Ancaq səfərdən gec qayıtdıq və bundan narahat idim. Dəyişiklik etsəydik, oyunumuz istədiyimiz kimi alınmaya bilərdi. Futbolçular öz mövqelərində yaxşı oynayırdılar.

- Rəqib komandanın baş məşqçisi Ray Farruciya Azərbaycanın fantastik komanda olduğunu bildirdi. Bunu kinayə kimi qəbul etmirsiniz?

- Məncə, millimiz barədə pozitiv fikirlər səsləndirmək olar. Əvvəl də dediyim kimi, oyundan razı qaldım.

 

- Səlahət Ağayev son zamanlar yaxşı formadadır. Ona şans vermək düzgün olmazdımı?

- Biz təcrübəyə daha çox önəm veririk. Kamran bu gün millinin ən çox forma geyinən futbolçusudur. Kamranın çox yaxşı oyunları olub, bu gün isə texniki səhvləri var idi. Səlahəti meydana buraxa bilərdik. Amma belə oyunlarda təcrübə çox vacib rol oynayır.

- Malta və Kosovo kimi komandalara qarşı yaxşı oyun sərgiləyirik, ancaq qələbə qazana bilmirik. Cəbəllütariq kimi antifutbol oynayıb qələbə qazana bilmərik?

- Belə oyunlar, belə xallar təsadüfi olur. Azarkeşlərimiz hər zaman gözəl futbol görmək istəyirlər. Mən həmişə demişəm ki, yaxşı komanda yaratmaq üçün çalışmalıyıq. Bəzən elə olur ki, rəqib istədiyin futbolu oynamağa imkan vermir. Nə mən istəyərəm pis oynayıb qalib gələk, nə də siz istəyərsiniz. 

- Millimizin qrupdan çıxmaq şansı nə qədərdir?

- Mən komandama inanıram. İnam olmasa, hazırlaşmağa ehtiyac yoxdur. Ola bilər ki, qarşıdakı oyunlar üçün heyətdə dəyişiklik etdim. Mənim istədiyim xarakter futbolçularda var. Oyundan-oyuna daha yaxşı kollektiv olacağıq. Hər iki oyunda qələbə qazanmağa çalışacağıq. Bunu futbolçular dərk edirlər. 

- Azarkeşlər oyundan sonra millini fitə basırdılar. Bu barədə nə deyə bilərsiniz?

- Azarkeşlərimiz qələbə istəyirlər. Onlara həmişə hörmətlə yanaşmışıq, haqqları var. Ən azı oyuna görə buna layiq deyildik. Bəlkə məni fitə basırdılar? O da ola bilər. Futbolçularıma irad bildirmədim. Onların yanındayam, futbolçularıma güvənirəm. 

- Premyer Liqada elə bir legioner futbolçu var ki, onu milliyə dəvət etmək istəyirsiniz?

- Olsaydı, milliyə cəlb edərdik. Amma belə bir fikrim yoxdur.

- “Neftçi”nin heç bir futbolçusuna şans vermirsiniz və azarkeşlər buna etiraz edirlər. Bu məsələyə nöqtə qoymağınızı istərdik.

- Mən “Qarabağ”lı olsam da, “Neftçi”yə simpatiyam var. Peşəkar futbola “Neftçi”də başlamışam və irəliyə getmişəm. Mən inanmıram ki, “Neftçi” azarkeşləri belə fikir səsləndirə. “Neftçi”nin futbolçuları klublarında stabil oynamırlar.  Məni tanıyan belə fikir səsləndirməz. Belə fikirlər olacaq. Digər klublar da bu barədə danışa bilər.

- Mahir Mədətov öz oyununa görə azarkeşlərin tənqidi ilə üz-üzə qalıb. Onun yerinə başqa oyunçu meydana buraxa bilməzdiz?

- Mahirə həddən artıq təzyiq var azarkeşlər tərəfindən. Mən sosial şəbəkələrdə olmuram, amma eşidirəm. Mahir ən hərəkətli oyunçularımızdan biri idi. Biz futbolçunu mütləq qazanmalıyıq. Bu gün qol pasını da o verdi. Bizim bu futbolçular xalq olaraq ehtiyacımız var. Mahir oyundan sonra paltardəyişmə otağında oturub ağlayırdı. Həmişə öz futbolçularımın yanındayam. Onların nələr keçirdiklərini məndən yaxşı heç kim bilməz. Mahirin, Pavelin qaşı partladı. Bu futbolçulara güvənmək lazımdı. Başqa oyunçularımız yoxdu. Onları itirmək istəmirəm. Əksinə daha yaxşı futbolçu etmək, peşəkar etmək istəyirəm. Onların hər biri həddən artıq məsuliyyətlidilər. Bəzən soyuqqanlı olmaq gərəkən epizodlarda çətinlik çəkirdilər. Bizim futbolda çatışmayan cəhətlər çoxdu. Amma istəyirik ki, onları itirməyək. Nə qədər onlara ehtiyacımız var, daha çox yapışmalıyıq. Futbolçularımı yaxşı tanıyıram. Bütün iradları öz üzərimə götürməyə razıyam ki, futbolçular oyuna rahat hazırlaşsınlar.