“İnci” şirkətlər qrupu ölkəmizin tarixinin, mədəniyyətinin, musiqisinin və simvollarının təbliği işinə dəstək məqsədilə “Oyal” məhsullarının qutu dizaynını yeniləməyə başlayıb. İlkin mərhələdə ixrac olunacaq “Oyal” məktəb və ofis ləvazimatlarının qutuları yenilənir. Yaxın gələcəkdə daxili bazarda satışa çıxarılan məhsulların da qutuları yenilənəcək.

“Qafqazinfo” xəbər verir ki, yeni qutu dizaynlarında məqsəd Azərbaycanı təbliğ etmək, eyni zamanda uşaqları düzgün istiqamətlənməsinə kömək etməkdir.

Bildiyimiz kimi, son vaxtlar uşaqlar “Spiderman”, “Ben Ten”, “Barbie”, “Betman” və “Garfield” kimi cizgi film qəhrəmanlarını özlərinə nümunə götürməyə başlayıblar. Bu zərərli qəhrəmanlar uşaqların dünyasını ələ keçirir. Halbuki bizim mədəniyyətimizi yaşadacaq, uşaqları gələcəyə hazırlayacaq, onları yaxşı və gözəl insan edəcək bir çox qəhrəmanlarımız var. Uşaqları xəyali qəhrəmanların mənfi təsirlərindən xilas etmək, qəhrəmanlarımızın, tariximizin, musiqimizin unudulmaması üçün çanta, qələm qutusu, qələm, su qabı, dəftər üzlükləri üzərində milli elementlərə yer veriləcəkdir.

“İnci” şirkətlər qrupu dizaynların hazırlanmasına ciddi yanaşıb. Qutuların dizayn işləri, ABŞ-ın məşhur dizayn və brendinq agentliyi “Character”də ştatdankənar əməkdaş (freelancer) kimi çalışmış mütəxəssis tərəfindən görülüb. Qeyd edək ki, “Character” agentliyi “Amazon”, “Staples”, “Nike”, “Uber” kimi böyük markaların işlərini ərsəyə gətirmişdir.

“İnci” şirkətlər qrupunun direktoru İsa Abbasov bildirib: “Müstəqil dövlətimizin tanıdılması, turizmin inkişafı üçün dövlətimizin apardığı siyasət göz qabağındadır. Ölkəmizdə təşkil olunan yarışlar, xarici dövlətlərdə təşkil olunan silsilə tədbirlər, yeni otellərin inşası, turistlər üçün viza sistemlərinin sadələşdirilməsi və s. kimi bir sıra tədbirlər müstəqil Azərbaycanımızın tanıdılmasına da xidmət edir.

Aparılan siyasətə dəstək məqsədilə “Məktəbli Arzuları” olan “Oyal” bu mövsümdən etibarən qutu dizaynlarının üzərində Azərbaycanımızı təbliğ edən yeni dizayn formatına keçir. “Oyal” məhsullarının üzərində milli naxışlar ilə Azərbaycanın tarixi abidələrinə, yeni inşa olunmuş əsrarəngiz memarlıq əsərlərinə, musiqi alətlərinə, milli nağıl qəhərəmanlarının rəsimlərinə yer veriləcəkdir. Azərbaycanda ofis və məktəb ləvazimatlarının tədarükçüsü kimi ölkəmizi təbliğ etməyi özümüzə borc bilirik.

Eyni zamanda, uşaqlar xarici cizgi film qəhrəmanlarını, “Real Madrid”in, “Barcelona”nın futbolçularını daha yaxşı tanıyırlar. Bu məsələdə təcili bir işlər görməyin vacib olduğunu düşünürük. Hesab edirik ki, yeni qutu dizaynları ilə mövcud problemin həllinə az da olsa kömək göstərə bilərik.

Bir müddət sonra yeni dərs ili başlayacaqdır. “İnci” şirkətlər qrupu valideynləri milliliyi təbliğ edən məktəb ləvazimatlarına üstünlük verməyə cağırır. Bizdə öz növbəmizdə, iş adamlarına və şirkətlərə tövsiyə edirk ki, öz imkanları daxilində Azərbaycanımızı təbliğ etməyə daha geniş yer ayırsınlar".

Qeyd edək ki, Bakıda və bir çox rayonda fəaliyyət göstərən “Ofisait” mağazalar şəbəkəsi “İnci” Şirkətlər qrupuna məxsusdur. Keyfiyyətilə seçilən “Oyal” məhsulları “Ofisait” mağazalarından daha münasib qiymətlərə satılır.