“Könlüm Qarabağda, Könlüm Zəngəzurda” düşərgəsi yekunlaşıb
Azərbaycan Respublikasının Gənclər və İdman Nazirliyinin dəstəyilə “Böyük Qayıdış” Gənclər Təşkilatı tərəfindən Qarabağ və Şərqi Zəngəzur regionundan olan gənclərin iştirakı ilə Ağcabədi Olimpiya İdman Kompleksində keçirilən, Zəfər Gününə həsr olunmuş “Könlüm Qarabağda, Könlüm Zəngəzurda” düşərgəsi uğurla yekunlaşıb.
Düşərgənin keçirilməsində əsas məqsəd Müzəffər Ali Baş Komandan İlham Əliyevin rəhbərliyi altında 44 günlük Vətən müharibəsində şanlı Ordumuzun parlaq qələbəsi ilə reallaşan Böyük Qayıdışa, Qarabağda və Şərqi Zəngəzurda dirçəlişə töhfə vermək istəyən gənclər arasında şəbəkələşməni təmin etmək, onların işğaldan azad olunmuş ərazilərdə könüllülük fəaliyyətini dəstəkləmək, eyni zamanda, gənclərin ideyalarını bir araya gətirərək təşəbbüskarlıqlarını artırmaq, müxtəlif təlim və görüşlər vasitəsilə onların şəxsi inkişafına dəstək olmaq və asudə vaxtlarını səmərəli təşkil etmək olub.
4 gün davam düşərgədə 65 nəfər Qarabağ və Şərqi Zəngəzur regionundan olan gənc “Zəfər”, “Dəmir Yumruq”, “8 Noyabr”, “Xarıbülbül” və “Qayıdış” adlı komandaların tərkibində iştirak edib. Düşərgədə gənclər üçün Vətən müharibəsi qazilərinin iştirakı ilə görüşlər, Qarabağda və Şərqi Zəngəzurda dirçəlişlə bağlı müxtəlif ideyaların və layihələrin müzakirəsi, işğaldan azad olunmuş ərazilərdə könüllülük fəaliyyəti haqqında infosessiyalar, tematik vorkşoplar, intellektual, şəbəkələşmə və komanda inkişafı oyunları, interaktiv təlimlər, eləcə də ekskursiyalar və asudə vaxtda müxtəlif əyləncəli fəaliyyətlər həyata keçirilib.
Düşərgənin son günündə iştirakçılar üçün Ağcabədi şəhərində yerləşən Qarabağ Atçılıq Kompleksinə ekskursiya təşkil edilib. Gənclər Qarabağ atları ilə yaxından tanış olub və kompleksin fəaliyyəti haqqında ətraflı məlumatlar əldə ediblər.
Gənclər tərəfindən böyük maraqla qarşılanan düşərgənin hər il keçirilməsi nəzərdə tutulur.