Bakı Ağır Cinayətlər Məhkəməsində müğənni Könül Kərimovaya və digər şəxslərə qarşı dələduzluq etməkdə təqsirləndirilən Məlahət Məmmədovanın məhkəməsi keçirilib.

“Qafqazinfo”nun verdiyi xəbərə görə, hakim Fikrət Qəribovun icraatında olan prosesdə şahidlərin dindirilmə mərhələsi baş tutub.

Hakim bildirib ki, bugünkü iclasa dəvət edilən şahid ağır xəstə olduğu üçün prosesə gələ bilməyib.

Ötən iclasda zərərçəkmiş Rəsul Quliyev ifadə verərək M.Məmmədovaya 180 min manat verdiyini açıqlamışdı. O bildirmişdi ki, Müdafiə Nazirliyində işləyib və sonra, yəni 2011-ci ildə təqaüddə olduğu zaman Gəncə Hərbi Komissarlığının rəisi vəzifəsində işləmək üçün 180 min manat rüşvət verib. Lakin daha sonra iş alınmadığı üçün pulu geri qaytarılıb.

İfadə verdiyi gün Səfərbərlik və Hərbi Xidmətə Çağırış üzrə Dövlət Xidmətinin Qazax rayon şöbəsinin rəisi işləyən polkovnik Rəsul Quliyev bu ifadəsindən sonra işdən çıxarılıb.

Bugünkü iclasda onun işdən çıxarıldığını öyrənən təqsirləndirilən M.Məmmədova buna etiraz edib: “Bu ədalətsizlikdir. Çünki bu işdə əvvəldən haqsızlıq var”.

Proses oktyabrın 10-da davam etdiriləcək. 

İttihama görə, M.Məmmədova bir neçə şəxsə müxtəlif vədlər verərək 300 minə yaxın pul alaraq qaytarmayıb. O, müğənni K. Kərimovanın oğlu Rəşad Rəhimovu Rusiya Universitetlərindən birinə qəbul etdirib, daha sonra Azərbaycan Dövlət İqtisad Universitetinə köçürtdürəcəyi vədini verib. M.Məmmədova əvvəllər də dələduzluqda ittiham olunub və şərti cəza alıb. 

Murad Əhməd