Azərbaycan millisinin sabiq qapıçısı Kamran Ağayev iki il fasilədən sonra ilk dəfə “Səbail” PFK-nın əsas heyətində Azərbaycan Kubokunun 1/4 final mərhələsində “Sumqayıt”a qarşı oyunda iştirak edib.

Oxu.Az xəbər verir ki, aldığı zədə səbəbilə futbola fasilə verən Ağayev bu barədə fikirlərini açıqlayıb:

“Baş məşqçimiz Aftandil Hacıyevin qərarına görə, əsas heyətin tərkibində meydanda idim. Mən əgər bu klubun oyunçusuyamsa, “hazır deyiləm”, “oynaya bilmərəm” sözünü işlədə bilmərəm. Baş məşqçi deyirsə “oynamalısan”, sən də oynamalısan. Yenidən meydanda olmaq və qələbə qazanmaq sevindirici haldır. Oyunda əsas məsuliyyət o idi ki, komandanın əziyyətini yerə vurmamalı idim. Çünki meydanda məndən başqa, daha 10 nəfər var idi. Qələbə də, məğlubiyyət də hamımızındır. Kiçik bir səhvlə məğlub ola bilərdik. Lakin qələbə ilə qayıtdıq”.

“Klubun uğurları üçün əlimdən gələni edəcəyəm”

Avqustun 25-də “Səbail”lə müqavilə bağlamış Kamran Ağayev uzun müddət futbolsuz qalsa da, etimad göstərdiyi üçün baş məşqçiyə təşəkkür bildirib:

“İlk olaraq, Aftandil müəllimə çox sağ ol deyirəm. Əlim gipsdə ola-ola “Səbail”dən zəng gəldi və məni dəvət etdilər. Açıq dedim ki, mən hələ 6-7 ay komandaya xeyir verə bilməyəcəyəm. Sağalma dövrü, adaptasiya və əvvəlki formama geri qayıtmaq zaman alacaq. Buna baxmayaq, mənə inanıb, güvəndiyinə görə təşəkkür edirəm. Klubun uğurları üçün əlimdən gələni edəcəyəm. Həmin vaxt bir çoxları inanmırdı ki, futbola geri qayıdım. Zədədən sonra karyeramın sonu olduğunu düşünürdülər. İndi isə təbii ki, əvvəlki formamda deyiləm. Lakin buna zaman və güc lazımdır”.

“İki ildən sonra ilk dəfə meydanda idim və ağrılarım çox idi”

34 yaşlı qapıçı hazırda milliyə qayıtmaq barədə düşünmədiyini də bildirib:

Bu dövrdə məşqçilər də, komanda yoldaşlarım da mənə dəstək oldular. Aftandil müəllim zədə almağımdan qorxurdu. Hələ də tam formaya düşməmişəm, artıq çəkilərim var. Hamısını bir vaxtda atmaq da olmur, bədən zəifləyə bilər. Ona görə də zaman lazımdır. Komandanı motivasiya edirdim ki, narahat olmayın, hər şey yaxşı olacaq, mən rahat oynayacağam. İki ildən sonra ilk dəfə meydanda idim və ağrılarım çox idi. Oyun ümumi baxanda yaxşı keçdi və uğur qazandıq. Normal həyatımda zarafatcıl, deyib-gülən biriyəm. Sadəcə iş başında olanda 90 dəqiqə başqa adam oluram. Qışqırıram, əsəbi oluram və s. Komanda yoldaşlarım bundan incimirlər, artıq öyrəşiblər (gülür).

Milliyə qayıtmağımla bağlı mənə çoxlu suallar gəlir. Bu günə kimi yada düşmürdüm. 90 dəqiqə meydanda olmuşam deyə indi mətbuatda müzakirə olunuram. Hazırda mən milli yığmaya qayıtmaq üçün yox, futbola qayıtmaq üçün forma yığıram. Əgər mənim yığma komandada oynamaq üçün çalışdığımı düşünənlər varsa, bu, yanlış fikirdir. Futbolçu sadəcə milli yığmada oynamaq yox, xeyir vermək üçün çalışmalıdır. Hazırda millidə yaxşı qapıçılarımız var və yetişirlər. Haqqımda çox şey yazırlar. Mənfi yazılanlara isə fikir vermir, həmin yazı ilə bağlı heç kimə geri zəng də etmirəm. Məni tanıyan və vicdanı olan şəxs düzgün yazar. Zədə aldıqdan və futboldan uzaq düşdükdən sonra çox insanın üzünü gördüm. Bir də qeyd etmək istəyirəm ki, meyxana demək mənim hobbimdir. Bunun oyunuma heç bir aidiyyəti yoxdur. Bu mövzunu qabardıb, zarafata çevirmək isə heç xoş deyil”.