“Yunanıstana qarşı kollektiv şəkildə yaxşı oynadıq, fiziki hazırlığımız da daha ürəkaçan idi. Taktiki planda da futzalçılar verilən tapşırıqları yerinə yetirdilər”.

Oxu.Az xəbər verir ki, bunu Azərbaycan Futzal Federasiyasının saytına açıqlamasında millimizin baş məşqçisi Joze Alesio da Silva deyib.

Futzal üzrə Avropa çempionatının seçmə qrup mərhələsi çərçivəsində növbəti oyununu keçirən Azərbaycan millisi səfərdə Yunanıstan yığmasına 3:0 hesabı ilə qalib gəlib. Oyunla bağlı millimizin braziliyalı çalışdırıcısı açıqlama verib:

“Əsas problemimiz yenə yaratdığımız epizodları qola çevirə bilməməyimizlə bağlıdır. Bunun üzərində işləyəcəyik. Çünki növbəti oyunumuz daha çətin olacaq və belə oyunlarda imkanları düzgün dəyərləndirməsək, istədiyimiz nəticəni də qazana bilməyəcəyik.

Yunanlara qarşı müdafiədə daha səliqəli oynadıq, rəqibə təhlükəli epizod yaratmağa imkan vermədik. Qapımıza tərəf maksimum 2-3 zərbə oldu. 10 gün ərzində tam formalaşmaq, toparlanmaq çətindir. Buna rəğmən, biz kollektiv oyun planında xeyli irəli getmişik.

Əlbəttə, qələbə qazanmağımıza və birinci pillədə möhkəmlənməyimizə görə məmnunam. Ancaq hələ mübarizə başa çatmayıb. Biz məşqlərimizi davam etdirməliyik. Moldova ilə oyuna indidən hazırlaşmalıyıq. Moldova həqiqətən də yaxşı kollektivə sahibdir”.

Qeyd edək ki, altı xalla qrup lideri olan millimiz Moldova ilə martın 4-də Bakıda qarşılaşacaq. Yığmamız cavab oyunu üçün martın 9-da Moldovaya səfər edəcək.