Bizə yaxşılıq yoxdur, yeşiklərlə gilas alar - Fəzail Ağamalının sözçüsü



 

"Allah haqqı, bizə yaxşılıq yoxdur. Xeyrimizə danışana da vedrə qoşuruq, ziyanımıza danışana da... Millət vəkili Fəzail Ağamalı mövsüm meyvələrinin bahalığından gileylənib. Əslində, hər kəsin dediyi sözü deyib. İndi hamı bahalıqdan şikayətlənir. Möcüzə kimidir. Kənddə həyətlərdə 1 manata satılan meyvələrə Bakıda satış mərkəzlərində, marketlərdə 5 qat bahasına qiymət qoyulub. İnsanlar sözün əsl mənasında tamarzı qalıblar. Bu niyə belə olur, araşdırılmalıdır. Kəndlinin alın təri ilə becərdiyi məhsulu ondan 1 manata alıb paytaxtda 7-8 manata satışa çıxaranın hansı şəbəkə olduğu müəyyən edilməlidir. Bunun qarşısı təcili alınmalıdır. Çünki məsələ artıq sosial narazılığın pik həddinə çatmaq ərəfəsindədir. Tərəvəzlərlə bağlı durum da təxminən eyni vəziyyətdədir”.

SeherXeber.org xəbər verir ki, bunu “Ana Vətən” partiyasının mətbuat xidmətinin rəhbəri Tünzalə İsmayıllı öz facebook səhifəsində Fəzail Ağamalının gilasın bahalığı ilə açıqlamasının sosial şəbəkələrdə müzakirə predmetinə çevrilməsinə mövqeyini açıqlayarkən yazıb.

O deyib ki, bu bahalığı Fəzail Ağamalı da görür: “Bəlkə də səbəbini bilir və problemi ictimailəşdirmək üçün açıqlama ilə çıxış edir. Deyir ki, bu vaxta qədər imkan edib mövsüm meyvələrindən ala bilməyib. Çünki qiymətləri bahadır: “Rayonları deyə bilmərəm, amma Bakıda bazar qiymətləri fantastik həddədir. Gilasın qiyməti 8-10 manat aralığında dəyişir. Belə şey olar?!”.

İndi iki gündür sosial şəbəkələrdə deputatı hoydu-hoyduya götürüblər. Onun gilasla “caps”ları düzəldilib paylaşılır. Biri deyir ki, maaş vaxtı deputata 1 kilo gilas alıb hədiyyə göndərəcək. O biri deputatın manipulyasiya etdiyini bildirir. Başqası da Ağamalının əmlaklarının siyahısını paylaşır ki, bəs, onun milyonları var, niyə belə danışır?!

Danışanda da vay, danışmayanda da..."

Onun sözlərinə görə, Ağamalı bu problemi özünəməxsus şəkildə ictimailəşdirib:

"Bahalığa etirazını bildirib. Hər kəsin demək istədiyini, hətta çoxlarının deyə bilmədiyini deyib. Mən əminəm ki, bunu başqa bir adam - məsələn, doktor Rəşid Mahmudov desəydi, alqışın biri bir qəpikdən olacaqdı. Bəs, Fəzail Ağamalı deyəndə reaksiya niyə belə olur? Bu sualın cavabı uzun ola bilər. Ona görə də uzunçuluğa ehtiyac yoxdur: Burada şəxsiyyətə münasibət həlledicidir.

İndi gələk məsələnin digər tərəfinə: Həqiqətənmi, Fəzail Ağamalının 8 manatı yoxdur ki, bir kiloqram gilas alsın?! Məzə tutmağı dayandırın! Əminəm ki, o istəsə, 8 yox, lap 18 manatdan da yeşiklərlə gilas alar. Buna maddi imkanı çatır". 

Sözçü deyib ki, problemi dilə gətirərkən alt qatda hansı niyyətinin olduğundan xəbərsizdir: "Amma səslənən problem hamımızı narahat edir. Lap dəqiq ifadə etsəm, deputat kasıb təbəqə ilə empatiya quraraq belə bir açıqlamayla çıxış edib. Həqiqəti deyib. Haqq danışıb. Etirazını bildirib... Bəs bunun qarşılığında nə alır? Elə onun səsləndirdiyi problemdən əziyyət çəkən təbəqə, biz deputat haqda lətifələr qoşuruq. Əsl lətifə da elə budur.

Özüm özümə sual edirəm: Görəsən, növbəti dəfə Fəzail Ağamalı hər hansı sosial problem haqda danışmaq istəyərkən hazırkı situasiyanı yada salıb tərəddüd edəcəkmi? Onu bilmirəm, amma bu reaksiya ilə qarşılaşan çox adam “nəyimə lazımdır?!” deyib keçərdi. 

P.S. Son illər qəribə olmuşuq. Deputat susanda da söyürük, danışanda da. Biz nə istəyirik? 
Gilası bildim. Başqa nə istəyirik?”

Mürtəza
SeherXeber.org