Rusiya sülhməramlılarının nəzarətində olan Azərbaycan ərazilərində müvəqqəti olaraq fəaliyyətini davam etdirən və özünü “Dağlıq Qarabağ” “parlamenti” adlandıran bir qrup separatçı yığını, guya ki, rus dilinin qeyd olunan ərazidə rəsmi dil kimi tanınması barədə “qanun” qəbul edib.

Aydın məsələdir ki, qondarma qurum tərəfindən qəbul edilən qondarma sənəd heç zaman və heç kim tərəfindən tətbiq olunmayacaq. Bu, sadəcə qondarma parlamentin guya ki, fəaliyyət göstərməsini yamsılamasıdır.  

Özü də nə Azərbaycan, nə Ermənistan, nə də Rusiya, ümumiyyətlə heç kim tərəfindən tanınmayan bir qurumun parlamentinin. Hətta müharibədən əvvəl belə dünyada heç kim “DQR” adlı qondarma qurumu tanımırdı. Müharibədən sonra isə hansısa qeyri-qanuni qurumun statusu, bu qurumun tanınması kimi məsələlər, əlbəttə ki, gündəmdə deyil.

Nə “DQR” var, nə status, ümumiyyətlə, heç nə yoxdur.

Sadəcə hələ ki rəsmi Bakıya, erməni əhalisinin yaşadığı Azərbyacan ərazilərində gündəlik həyatı bərpa etməyə yardım edən sülhməramlılar var.

Vəssalam.

İndi özünü “deputat” adlandıran separatçı qalıqlar “böyük qardaş”ın qiymətləndirəcəyi ümidilə qərar qəbul ediblər. Qiymətləndirəcək və başlarına sığal çəkəcək. Bəlkə də, öz tikəsindən qalan qırıntıları da bölüşəcək. Ən yaxşı halda isə onları həqiqətən də müdafiə etməyə qalxacaq.

Lakin kimdən və kimin torpağında?

Gülməlidir, elə deyilmi?..

Separatçıların cəhdləri aydındır. Onların başqa ümid yerləri yoxdur. Onlar öz mifik aləmlərində yaşamağa və bu dəfə də rus diliylə bağlı növbəti qondarma qanunu qəbul etmək üçün sanki Rusiyada populyar “Ev-2” teleşousundakı kimi ocaq ətrafında toplaşmağa davam edirlər.

Nə isə, bunlar bir qırağda qalsın.

Burada digər bir məsələ diqqər çəkir. Rusiyanın “RİA Novosti” informasiya agentliyinin davranışı. Birincisi, agentlik bu məlumatı dərc edir, ikincisi də burada yenidən “parlament” və “Dağlıq Qarabağ Respublikası” kimi ifadələrdən istifadə edir. Hərçənd ki, “tanınmamış” sözünü də əlavə edir.  

Bəli, “RİA Novosti”nin davranışı heç də təəccüb doğurmur. Belə ki, o, baş direktoru Dmitri Kiselyov, baş redaktoru isə Marqarita Simonyan olan “Rusiya bugün” Beynəlxalq informasiya agentliyi” Federal dövlət unitar müəsisəsinin tərkib hissəsidir.

Lakin dünyanın ən böyük informasiya agentliklərindən biri olan Rusiyanın dövlət müəssisəsinin öz ölkəsinin başçısının bəyanatlarına açıq şəkildə saymamasını nəzərdən qaçırmaq mümkün deyil.

Məlum olduğu kimi, Vladimir Putin dəfələrlə Qarabağ müharibəsinin yekunları barədə fikir bildirərkən açıq və dəqiq şəkildə ifadə edib ki, vaxtilə işğal altında olan torpaqlar Azərbaycan əraziləridir və rəsmi Bakı istənilən yolla, o cümlədən də hərbi yolla öz ərazilərini işğaldan azad etmək hüququna malikdir.

Rusiya prezidenti heç vaxt Azərbaycanın ərazi bütövlüyünü sual altında qoymayıb və açıq şəkildə bəyan edib ki, Qarabağdakı erməni separatçılarını, Ermənistanın özü də daxil olmaqla, heç kim tanımayıb.  

Təkrar edirəm, rəsmi Moskvanın buradakı mövqeyi dəqiq və aydındır. Hansısa “DQR”, tanınmamış qondarma dövlət və ya qondarma parlament, hələ bu parlament tərəfindən qəbul olunan qondarma qanun barədə söhbət belə gedə bilməz.

Əgər rəsmi Moskvanın birmənalı xarici siyasət baxışının mövcud olduğu bir məsələyə münasibətdə dövlət informasiya agentliyi bu cür təxribatçı hərəkətlərə yol verirsə, bu, Kremldə müəyyən suallar doğurmalıdır.

Özü də kifayət qədər konkret suallar. Ən azı agentliyin və onun baş redaktorunun siyasətinə dair.

Həmid Həmidov