Martın 16-da Budapeştdə Macarıstan Güləş Federasiyasının (MCF) 100 illik yubileyi qeyd olunub.

Bununla bağlı Azərbaycan Güləş Federasiyasının prezident əvəzi, Dünya Güləş Birliyinin (UWW) Büro üzvü Namiq Əliyev, UWW-nin prezidenti Nenad Laloviç, Beynəlxalq Olimpiya Komitəsinin (İOC) İcraiyyə Komitəsinin üzvü Pol Şmitt, Macarıstan Olimpiya Komitəsinin üzvü Kristian Kulçar və Macarıstan Olimpiya Komitəsinin prezidenti Peter Başçanın iştirakı ilə tədbir keçirilib.

Tədbirdə bildirilib ki, geridə qalan 100 ildə beynəlxalq arenalarda 129 Macarıstan güləşçisi 429 medal qazanıb. O da vurğulanıb ki, bu ölkənin güləş əfsanəsi, Olimpiya, dünya və Avropa çempionu İştvan Kozmanın adını daşıyan güləş akademiyasında gələcəyin çempionlarını yetişdirmək üçün əlverişli şərait yaradılıb.

Nenad Laloviç isə bunları söyləyib: “Akademiyada Olimpiya çempionlarının şəkillərinin vurulduğu stendə tamaşa etdim. Bundan çox təsirləndim. Gördüyüm mənzərə macar güləşinin gücünün göstəricisiydi. UWW-nin daha güclü olması üçün onun üvzləri də MCF kimi güclü olmalıdır. Sizi 100 illik yubileyiniz münasibətilə təbrik edirəm. Şadam ki, bu əlamətdar tarix Avropa Olimpiya Təsnifat turniri ilə üst-üstə düşdü və mən də bu yubileyi sizinlə birgə qeyd etdim”.

Qeyd edək ki, sabah həm sərbəst, həm qadın, həm də yunan-Roma güləşində altı çəkidə finalçıların Olimpiadaya lisenziya qazanacağı təsnifat yarışı start götürəcək. Martın 21-dək davam edəcək turnir BOK İdman Mərkəzində təşkil ediləcək. Bu gün bütün çəkilər üzrə püşkatma mərasimi keçiriləcək. Tədbir Bakı vaxtı ilə saat 20:00-da başlayacaq.