Maya sivilizasiyası necə məhv olub? - Tarixi səbəb açıqlandı



 

Kembric Universitetinin alimləri Maya sivilizasiyasının məhv olması səbəblərini açıqlayıblar.

“Qafqazinfo” Azərtac-a istinadən xəbər verir ki, onların fikrincə, Maya mədəniyyətinin yoxa çıxmasına quraqlıq səbəb olub.

Tədqiqatçılar bu nəzəriyyənin sübutunu Çiçançanab gölündə tapıblar. Alimlər Yukatan yarımadasında illik yağıntı miqdarının 41 faizdən 54 faizədək azalmasının qanunauyğunluğunu aşkar ediblər. Qədim sivilizasiyanın məhv olduğu dövrdə bu göstərici 70 faizə çatıb, rütubət isə orta hesabla 7 faiz azalıb.

Tədqiqatın rəhbəri Nikolas Evansın fikrincə, təhlil etibarlıdır, çünki sivilizasiyanın məhv olması səbəbləri 1990-cı ildən öyrənilir. Tədqiqatçılar sivilizasiyanın mövcud olduğu 800-1000-ci illər arasında hidroloji şəraitin dəqiq modelini qurublar. Alimlərin fikrincə, güclü quraqlıq məhsuldarlığa təsir göstərib. Maya hindiləri ekstremal şəraitdən sağ çıxa bilməyiblər.

Məlumdur ki, qədim sivilizasiya 4 min il əvvəl mövcud olub. Mayalıların yaşadığı ərazidə hazırda Meksika, Beliz və Honduras yerləşir.